Gulbbenjárgga ođđasishuksema dállu
Juos mátkkoštát Davvi-Romssas de fuobmát ahte viesut máŋgga guovllus leat oalle seammaláganat sturrodaga ja hámi ektui. Dat leat muoras huksejuvvon viesut main lea hárjedáhkki ja olgoseinniin fielloskoađas, ja dávjá dát viesut leat 1 ½ dahje 2 geardásaččat. Hárjedáhkis leat dávja geađgerávttut, dáhkkebábir dahje eternihtta. Dábálaš orrunviidodat lea 70-90 m2 ja viesuin lea dávjá kvadráhta dahje rektangela hápmi, ja vel lasseoassi mas feaskkir ja biebmovuorká ledje. Dát viesut leat eanaš osiin huksejuvvon 1940-logu loahpageahčen ja 1950-logus.
Gulbbenjárgga ođđasishuksema dállu Jiehkarvuonas lea dábálaš ovdamearka dán ođđasishuksema arkitektuvrras. Gulbbenjárgga olbmot evakuerejuvvojedje skábmamánu 19. beaivve 1944 ja mátkkoštedje jiekŋamearravanccain Lundenesii Háštad lahkosii. Manai measta guokte jagi ovdalgo sii máhcce fas siidii ja buollántonttiide álgogeasis 1946. Dalle sii huksejedje veahkkeviesu mas orro vuosttas jagiid.
Veahkkeviessu lea boares orrunviesu geađgejuolggi nalde mii boldojuvvui 1944. Dan bálddas oidnojit vel boares gilvvagárddi bázahusat. Dálá orrunviessu válmmaštuvai 1950-logu álggus. Ođđasishuksema mielde bođii maid el-rávdnji ja čáhcebohcci sisa. El-rávdnji biddjojuvvui 1953 ja čáhcebohcci fas 1960. Viessu lea dál siskkobealde dakkár go lei 1982 go maŋimuš olbmot fárrejedje eret.
Návet huksejuvvui ovdal orrunviesu. Lei dehálaš oažžut albma viesu elliide. Návehis lea láđđu bajábealde ja vuodjinsildi dohko. Návet lei rehkenastojuvvon 2 gussii, gálbbiide ja 8-10 sávzii.
Dálus leat guokte návstti. "Boaresnávsti" huksejuvvui bázahusávdnasiin, omd. lea dáhkki ráhkaduvvon boares vancafielluin.
