Gamslett guolásteaddjiboandadállu
Gamslett guolásteaddjiboandadállu lea Davvi-Romssa Musea váldorusttet Ivgu suohkanis.
Sajádat
Gamslett guolásteaddjiboandadállu lea s. bealle kilomehtera davás Bávttit feargakaias fylkkabálgá 312 mielde. Dállu lea erenoamáš čáppa sajis Moskavuona gáttis. Mátki Romsii bistá s. ovtta diimmu oktan feargamátkkiin Guohcamohki ja Bávttit gaskkas. Ivgomuotkái lea 30 km.
Museala doaibma
Gamslett lea dábálaš guolásteaddjiboandadállu man ruohttasat leat 1700-logus. Ásaiduvvan Gamslett birrasiin lea boaris. Čálalaš gálduin oidno ahte dáppe orro olbmot juo 1569, ja ahte dálus ledje fásta ássit 1610. Lea dieđus ahte dan njealje oamasteaddjis lei guoktásis sohkanamman Svendsen.
Alf Gamsletta čoakkáldat
Guolásteaddjiboandakultuvra lei dábálaš eallinvuohki Davvi-Romssas gitta 1950-lohkui. Olbmot ožžo birgejumi luondduresurssain mat iešguđet jahkeáiggi ledje oažžumis. Dábáleamos vuohki lei seaguhus masa gulle guollebivdu, eanandoallu ja meahci riggodagaid čoaggin.
